ڕێحان پهلش دێز شهست پهڕ جه باخان
سۆسهن و نهسرین شهوبۆی ئێڵاخان
بهرزهڵنگ جه کۆ چنوور جه کاوان
سهوزیو مێرغوزار هاڕهی بهفراوان
چهنی هامسهران نیشتهبێم وه شاد
به کهیف و ئاههنگ خهم مهدام وه باد
گۆش به سهدای ساز چهم به نگاوه
جه قاوهخانهی ڕای کهماڵاوه
لێو به پیاڵهی عهقیق رهنگهوه
گاهێ پڕ به شهوق گا به خهندهوه
گا نگای کۆسار بهرزی ئێڵاخان
گا نگای خهزان، گا نگای زهردان
جهی عهیشو نیشات جهی خهوی بهتاڵ
زیندانم ئهسڵهن نامان به خهیاڵ
ههر پاسهم زانان وێم شههریارم
چهرخی کهج کردار نهدان ئازارم
پاسهم مهزانا شای خاوهن بهختم
نهزانام مهزڵوم حهپسی بهدبهختم
وهختێو بیدار بیم تهماشا کهردم
ئاژان و زیندان نهزهر ئاوهردم
چهنده مهدهۆش بیم تهواسامهوه
عهقڵو فامو هۆش نهمهن لامهوه
سهد موقابیل بی باری خهمانم
وهسۆ ئاماوه سۆتهی زامانم
غهیر جه ئێشو نێش جهفای رۆژگار
هیچ سودیو جهفاو نهدیم جه ڕووی کار
زامی کۆنهو نۆم تازه کهردهوه
زار زار مهناڵام وه دهم دهردهوه
یاڕهب ههر کهسێو که ڕۆش نههات بۆ
زام زهدهی تهقدیر ڕووی سهربیسات بۆ
کهشتی نگینش ههر سهرنگونهن
نه گێجاوی گێج ڕوودی جهیحونهن
مۆرهی ئیقباڵش دووشهش ناوهدهن
چهنی بهدبهختی مامهڵهش کهردهن
خوردو خوراکش ژاراوی زهردهن
خاوی شیرینش ههر ئێشو دهردهن
یارهب به حاجهت رهسوولی حهبیب
خاکی غهریبیم نهکهری نهسیب
(عهبدۆڵا بهگی ههورامان)
+ نوشته شده در شنبه نوزدهم اسفند ۱۳۹۱ ساعت 21:11 توسط نوری براری
|
شناخت جاذبه های توریستی منطقه هورامان (روستای دره کی)